Aure yana daga cikin manyan ibadu da muhimman hulɗoɗi a rayuwar ɗan Adam, wanda Musulunci ya ba shi matsayi na musamman. Ba wai kawai aure wata al’ada ce ta zamantakewa ba, ibada ce da Allah Maɗaukakin Sarki Ya halatta, Ya kuma ƙarfafa yin ta domin tsare mutunci, gina iyali, da tabbatar da zaman lafiya a cikin al’umma.
Musulunci ya bayyana cewa aure sunna ce ta Annabawa, kuma duk wanda ya juya masa baya ba tare da dalili ba, ya bijire wa tsarin da Allah Ya shimfiɗa domin bauta da rayuwar ɗan Adam. Manzon Allah ﷺ ya ce:
“Aure daga cikin sunnata yake, duk wanda ya ƙi sunnata, ba ya tare da ni.”
Wannan na nuna girman darajar aure a Musulunci da kuma muhimmancinsa wajen gina rayuwar mutum ta duniya da lahira.
Kulawar Musulunci ga Aure
Musulunci ya kula ƙwarai da aure, ya tsara masa:
- ƙa’idoji
- ladubba
- hukunce-hukuncen shari’a
- haƙƙoƙin ma’aurata
Dukkan waɗannan an shimfiɗa su ne domin:
- tabbatar da dawwamar aure
- kawar da zalunci
- samar da soyayya da tausayi
- gina iyali mai tarbiyya
Allah Maɗaukaki Ya ce a cikin Al-Qur’ani:
“Kuma daga cikin ayoyinsa akwai Ya halitta muku mata daga kanku, domin ku samu natsuwa a wurinsu, Ya kuma sanya soyayya da rahama a tsakaninku.” (Suratul Rum: 21)
Wannan aya ta nuna cewa tushen aure a Musulunci shi ne natsuwa, soyayya da rahama, ba wahala ko azaba ba.
Manufofin Aure a Musulunci
Aure a Musulunci yana da manyan manufofi, daga ciki akwai:
- Kare mutum daga zina da alfasha
- Tsare mutunci da kima
- Samar da halal hanyar biyan buƙatar sha’awa
- Haihuwa da tarbiyyar ‘ya’ya
- Gina iyali mai addini
- Samar da kwanciyar hankali da haɗin kai
Saboda haka, aure ba don jin daɗin jiki kawai aka halatta shi ba, har da cikar rayuwar Musulmi gaba ɗaya.
Neman Aure a Musulunci (Khuxuba)
Neman aure shi ne mataki na farko kafin aure ya tabbata. A Musulunci, wannan mataki yana da ladubba da hukunce-hukuncen da dole a kiyaye.
Ya wajaba ga Musulmi ya yi ƙoƙari ya zaɓi:
- mace saliha
- mai addini
- mai kyawawan ɗabi’u
- mai tarbiyya
Manzon Allah ﷺ ya ce:
“Ana auren mace ne saboda abubuwa guda huɗu: dukiya, asali, kyawu da addini. Ka fifita mai addini, sai ka rabauta.” (Bukhari da Muslim)
Wannan hadisi ya nuna cewa addini shi ne ginshiƙin zaɓin abokiyar zama.
Rawar Iyaye da Waliyyai a Aure
Musulunci ya ba wa iyaye, musamman waliyyin mace, muhimmiyar rawa a aure. Dole ne su:
- kula da jin daɗin ‘yarsu
- tabbatar da nagartar mai nema
- sauƙaƙa aure idan mutumin mai addini ne
Manzon Allah ﷺ ya ce:
“Idan wanda kuka yarda da addininsa da halayensa ya zo muku, ku ba shi aure. Idan ba haka ba, fitina da barna za su yawaita.” (Tirmizi)
Wannan gargadi ne mai ƙarfi ga iyaye da ke ƙin aure saboda dukiya ko kabilanci kawai.
Hukuncin Kallon Wadda Ake Nema Aure
Shari’a ta halatta ga mai neman aure ya kalli wadda yake nema domin sanin:
- halittarta
- kamanninta
- yadda zai iya jure zama da ita
Sai dai wannan kallon yana da iyaka, kuma ba tare da keɓantuwa ko taɓawa ba.
Annabi ﷺ ya ce wa wani Sahabi:
“Ka duba ta, domin hakan zai fi sa aurenku ya dawwama.” (Tirmizi)
Wannan ya nuna hikimar Musulunci wajen gina aure mai ɗorewa.
Abubuwan da Haramun Ne a Lokacin Neman Aure
Duk da an yi alƙawarin aure, mace tana nan manisanciya ga namiji har sai an ɗaura aure. Saboda haka, haramun ne:
- keɓantuwa (khalwa)
- taɓawa
- sumbata
- soyayyar banza
- mu’amala ta sirri
Musulunci ya toshe duk wata hanya da za ta kai ga zina ko lalacewar tarbiyya.
Hukuncin Neman Matar da Aka Riga Aka Nema
Haramun ne a Musulunci mutum ya nemi auren mace da aka riga aka yi mata khuxuba, muddin ba a warware alƙawarin ba.
Manzon Allah ﷺ ya ce:
“Kada mutum ya nemi aure a kan neman auren ɗan’uwansa.” (Bukhari)
Wannan domin kare mutunci, kawar da hassada da rikici.
Xaura Aure da Sharudansa
Aure ba ya inganta sai da:
- Amincewar waliyyi
- Sadaki
- Shaidu biyu adalai
- Ijab da Qabul
- Yardar ma’aurata
Sadaki wajibi ne a Musulunci, kuma alamar girmamawa ce ga mace, ba sayenta ba.
Haƙƙoƙin Ma’aurata a Musulunci
Haƙƙin Miji a kan Mata
- biyayya a halal
- kula da mutuncinsa
- tsare dukiyarsa
- tarbiyyar ‘ya’ya
Haƙƙin Mata a kan Miji
- ciyarwa
- sutura
- muhalli
- kulawa
- tausayi
- adalci
Allah Ya ce:
“Ku zauna da su cikin alheri.” (Suratun Nisa’i: 19)
Kammalawa
Aure a Musulunci tsari ne mai cike da hikima, rahama da adalci. Idan aka aiwatar da shi bisa koyarwar Al-Qur’ani da Sunnah, yana haifar da:
- zaman lafiya
- soyayya
- tarbiyya nagari
- al’umma mai inganci
Ya wajaba ga Musulmi:
- su nemi ilimin aure
- su bi dokokin shari’a
- su guji bin son zuciya
- su fifita addini
Allah Ya sanya auratayyar Musulmi albarka, Ya kyautata zamantakewarmu, Ya kuma ba mu iyalai na gari. Amin.
Idan wannan rubutu ya amfane ka, ka raba shi domin wasu su amfana. Mu haɗu a rubutu na gaba, in sha Allah.